Die Schweiz das Paradies. Gleich mehrere Cliquen amüsieren sich über unsere heile Welt. Dabei kommt kein Klischee zu kurz.

I kenn e Land (y kenn’s fascht pynlig gnau),

und du, du kennsch es heggschtwohrschynlig au:

E Land mit griene-n-Aue, griene Wälder

– vyl moolerischerer lyychte niene d’Fälder –

yybettet zwische Schnee und Näbelschwade

kasch im e See grad näb de Rääbe bade.

Verdruggt vo zimmlig jedre Art vo Bärge

hoggt dert e ainig Volgg vo Gartezwärge

Seibi

-

By uns in dr Schwyz, zem Gligg isch’s woor,

sin die Maischte ganz sälte in grosser Gfoor.

Terrorischte mache um uns e wyyte Booge,

wyl doo g’joodlet wird, mien die sich frooge:

isch das Gschrey ebbis Ghaims, unverschtändlig

fir s’Pagg,

oder druggt däänen s’Militärmässer naimen

uffe Sagg?

Schopf-Sprysse

-

Schoggi Käs und Uhre

Fyr das sinn mir bekannt

Sackmässer und e Kaffi Lutz

Verträtte unser Land

Und nadyyrligg s’Edelwyss

Gheert derzue wie’s Bündnerfleisch

Um das git’s ab und zue e Gschiss

Wenn’d s’Bliemli uf em Hemmli draisch

Wirbel-Waggis

-

Wenn die Schweizer Perfektion Risse hat, dann sind sie vor allem tierischer Natur.

Faggt isch: d’ Tierschützer und d Hirte wänn nid verliere und wärde dä Kampf immer wyterfiere,

so dass sy linngs und rächts gar nyt me g’sehn

und d’Schööfli gmietlig uff d’Waid uuse gehn

und der Wolf sich dänggt «s’isch my glyggsdaag hytt»

wenn zwai sich stritte frait sich der dritt!

Rhywasser-Kepf

-

Im Circus kasch jetzt kai Elefante me gsee,

si hänn si miese uss em Programm usenee.

Si solle doch ihr Zält im Färnsee gää,

die kennte das fyr ihri Elefante-Runde nää.

Klybegg Chnulleri

-

Die Elefanten-Runde bringt uns direkt nach Bundesbern. Zwar nicht zu den Parteipräsidenten. Aber zu einer neu gewählten Politikerin – einem Kaliber mit vergleichbarer Ausstrahlung.

Der Keenig Christoph isch verdriibe,

doch d Strippe sinn em als no bliibe.

Drum git er vo sym Schatz im Schloss

mit volle Händ em alte Dross.

Die mache denn, graad was er will,

und äär spiilt zfriide s Groggodil.

Au sy Dochter dritt jetz uff,

als Brinzässin – maischtens muff.

Si blochered schaarf mit Verstand

jeede Dreamer glatt an d Wand.

Die Aagfrässene

-

Nach dem Namen Blocher fehlt im Bunde eigentlich nur noch einer: Herr Blatter, der Weltverbesserer beziehungsweise seine korrupte Fifa. Die Chropf-Clique-Rieche stimmt dazu einen Schweizer Klassiker an (Schacher Seppeli) und auch die anderen Cliquen sagen, was sie von Blatter halten.

Das isch dr Blatter-Seppeli, bekannt im ganze Land

sait, är syg gar kai Deppeli – nai är syg e Gigant.

syg d’Fifa in Persona

und gäb dr grossi Doon aa

denn d’Fifa syg im Grund nur är

und gitts e Gschiss und gitts e Gschäär

und au nach usse e Gekäär

no isch’s jo wirgglig au nit schwäär

z’saage – wär isch z’schuld dra, wäär?

he dängg in däm Fall au nur – äär!

Chropf-Clique-Rieche

-

Doo wird gschmiirt! (esoo isch s z nenne),

vo dääne, wo sich s laischte kenne!

... und aimol meh wird regyschtriert:

S isch numme s Gäld wo d Wält regiertè

– Aine maint zwar: «Eso ischs glatter! ...

... es griesst Eych ussem Knascht, dr Blatter!»

Helvezia-Strizzi

-

Es duet aber scho imene Määrli stoo

Nämmlig im Gschichtli vom Pinnocchio

Das em Sepp Siini d’Nase vom Pinnocchio nit duet toppe

Duet dä schlaui Walliser s’Wachstum chemisch

stoppe

Räätig Waggis

Scrollen Sie hier durch alle 36 Zeedel der Stammcliquen.