E Spriichwoort sait wie Stadt und Land,

sitt Joore umgeen mitenand:

Dr Gschyyderi git noo

Und s Baselbiet blybbt stoo!

Bangg Rott

D Frau Arslan het schiins Schulde ghaa vo 110 Millioone!

Die het sii bläächt und ghofft me wüürd si uff em Land verschoone...

Dr Grund, dass daas nit zooge het, das isch e ganz banaale:

Es het nit zum Kantoon basst, dass die Frau ka Schulde zaale!

Brunzguttere

D Frau Pegoraro dretzeled: „Mir wai nit fusioniere!

Wai au kai Rappe ins Theater Basel inveschtiere,

Öisi Kultur, das isch der Buur, jetz gääbed ändlech Rue,

Scho mit Kollega Wüetrich Urs hai mir Theater gnue.“

PereFyss

Mir faare mit der SBB durs scheene Baselland,

Uff Schritt und Dritt die Armuet gsee, nai das isch e Schand.

Mir Stedter hälfe jeedem Rammel – dasch e Riiselaischtig,

Doch laider isch die Hilf fir d Katz, denn d Armuet die isch gaischtig.

PereFyss

Mir faare mit der SBB, durs scheeni Baselbiet,

Gseen Heechefyyr an Heechefyyr, das schloot is bees uffs Gmiet,

Si nämme Holz vo iiberaal, die Fraue, Männer, Kind:

Jo nämmed doch firs näggschte Fyyr die Brätter vor em Grind.

PereFyss

Dass d Sibel Arslan d Stell nit kriegt, das isch e Hoon

Klar het si Schulde, und kai Qualifikatioon

Si schafft schyyns schluuderig, jä d Mängel sin frappant

Die basst doch optimal zum Kanton Baselland

Babberlababb

Dä Räber macht uns kei vergniege,

Wie s iPhone6 losst är sich lyycht verbiege

D Laggaffe

Was hänn denn d Basel-Ländler mit dämm Nei zu uns dervoo?

Dass die sich wyter weere ändligg doch nach Basel z koo?

Durch d Ergolz und durch d Birs doo kunnt doch dääne iire Brunz

am Ändi in dr Rhy und denne ainewääg zu uns.

Dr Warmduscher